الأحد، 20 يونيو 2010

طلاب الثانويه العامه


فاكرين لما قولتلكم ما ينفعش نعمل معرض او توعيه او او داخل الجامعه عن تعديل الدستور
و لازم التوعيه تبدأ بحاجه تهم الشباب مش تعدبل الدستور اللى هما مش حاسين و لا فاهمين اهميته

حصل موقف حبيت احكيه ليكم يثبتلكم كلامى
بس قبله احب اعرفكم بشخصيه اخويا و اصحابه
دول شباب فى 2 ثانوى عام كل اللى بيشغلهم فى الحياه هو رقص النيجر و المزيكا و الخروخ و البنات
كل اصحابهم ع الفيس اجانب او ايموز او بنات مهيسه .. الخ

طبعا كلكم سمعتم عن صعوبه امتحانات الثانويه السنه دى
الشباب اللى زى الفل دا .. بعد امتحان التفاضل كانو جابو اخرهم لانهم خسرو ال 3 مواد اللى داخلين يلمو بيهم درجات
و طبعا بعد ما ابويا بيدفع له 1200 جنيه دروس فى الشهر غير اللى دفعه فى المراجعات اخر اسبوعين و الضغط اللى عليهم (مش عاوزينك تبقي فاشل و تدخل تجارة زى اختك ولازم تدخل مش عارف ايه زى ابوك و و )د
والشباب دول اكتر ناس و اكتر سن بيعترض على اسلوب المظاهرات و اى حاجه الناشطين بيعملوها

اتفاجئت باخويا و اتنين اصحابه (اللى عندى ع الفيس ) بيقولولى بما انك بتروحى مظاهرات و تعرفى ناس كتير بيروحو احنا عاوزين نعمل مظاهره قدام وزاره التربيه و التعليم و نقولهم ان لو الامتحان الجاى ما جاش فى مستوى الطالب االمتوسط او حتى الممتاز (يعنى مش امتحان تعجيزي ) محدش هيدخل الامتحان اللى بعده
و هما جاين يقنعمونى انهم لو عملو كده الوزير هيخفف الامتحان الجاى و هيزود درجات الاسئله الصعبه فى الامتحان اللى فات ووو

باستثناء كل الرغى و الهزار و الضحك ووو .. حاولت افهمهم ان دا ما ينعفعش و هيضر اكتر ما هينغع
انا قول احكى ليكم عشان اثبت لكم ان اى حد فى الدنيا ممكن يتحرك بس عشان مصلحته
محدش فاهم ان التعديلات الدستورسه دى مصلحتهم
لكنهم فهمو انهم لما يعملو كده هينجحو و بمجاميع عاليه و هيحققو مصلحتهم

و لما قعدت معاهم و اقنعتهم ان تعديل الدستور ممكن يوصلهم للى هما عاوزينه اقتنعو و عرفو انى مش غلط فى اى حاجه باعملها

ارجع ليكم بقى يا ناشطين
عاوزبن تحركو اى حد فى الدنيا .. موضوع مش صعب ابدا اذا ربطته بمصلحه شخصيه يقدر يحققها

ادعو بقي لطلبه ثانوى و اولهم اخويا و اصحابه ينجحو و يجيبو مجموع كويس ^_-

الأربعاء، 9 يونيو 2010

كورسات حوارات بتاعات



مع بدايه الاجازة يبدأ موسم الكورسات - كمبيوتر و لغات و دورات متخصصه فى كل مجاال فى الدنيا
و مع بدايه السنه الدراسيه يرجع دكاتره الجامعات و المعاهد لتدريس المناهج اللى عف علبها الزمن و اللى هما عارفين دا و متأكدين منه و رغم كده بيدرسهالك
صديق ليا قالى اعتبري دراستك دى تاريخ و بتعرفيه
تخيلو حد بيضيع من عمره 4 سنين )ع الاقل) عشان يعرف تاريخ عمرة ما هيستفيد بيه
انا مش باعترض على التاريخ ولا ع الدراسه
انا باعترض ع الاستغلال اللى حاصل
باعترض على كميه الفلوس و الوقت و المجهود اللى لازم اضيعه بعد ما اخلص مشوار صعب و طويل فى كليه تعبت اصلا على ما وصلت ليها
و دفعت و ضيعت وقت فيها
مش هاعترض على مناهجى
بس هاعترض لو ما لقيتش اللى باخده فى الكورسات مش باتعلمه فى جامعتى
هاعترض لو خرجت من كليه محترمه من غير ما افهم حاجه واحده تفيدنى فى شغلى اللى هتتطلع عيني لحد ما الاقيه
ما عنديش مانع بعد ما ادرس 4 سنين تجاره ملهاش لازمه اخد سنه خامسه ادرس فيها كوسات و بس
بس فى النهايه اخرج من الكليه على شغلى

Translate

Related Posts Plugin for WordPress, Blogger...