انا من الناس اللى بترتبط بشغلها جدا بشكل عاطفى وعقلانى على التوازى
بحب كل مكان اشتغلت فيه، او حتى مجرد قدمت له بربوزل اوما شابه
بحس انى مدينة لكل مكان اشتغلت فيه وكل شخص اشتغلت معاه و لأى مشروع فكرت فيه ولو دقايق بحاجات كتير جدا .. وبشوف انه سبب اضافه ليا ولولاه ما كنت أنا بكل تشكيله دماغى دلوقتى 😇
- دايماً بستغرب الناس اللى بتشتغل ومش حابه شغلها، شايفه ان كل واحد يقدر يعدل ف ظروف شغله ويحولها للشكل اللى يناسبه هو .. أو أقل تقدير يخلق لنفسه شيئ جانبي يلاقى فيه نفسة
- أغلب الوقت مش برفض اى شغل -ولو انى بقيت اعمل دا مؤخراً حفاظاً على صحتى النفسية والعقلية- لكن بشوف مهما كانت بساطه الشغل انه اضافه ومهما كانت صعوبته انه تحدى وحاجه لازم اتعلمها
- أغلب الوقت مش بستمر فى الشغل بسبب الاشخاص المحيطين مش الشغل نفسه .. بشوف انى اشتغل مع شخص واحد بيفهم او مشروع صغير بيقسم ادوار ومهام احسن الف مره من شغلى فى شركة كبيره فيها ضغط ومنافسه وحرق دم
- أغلب الوقت بكتشف ان حب الشغل لوحده مش سبب كافى للإستمرارية فيه .. وانى محتاجه تقدير، وقت، فلوس ..حاجات كتير اكتر من مجرد مشاعر ارتباط عشان اقدر أكمل
- أغلب الوقت بغضب بسبب عدم تنفيذ الافكار المطروحة بالشكل اللى فى دماغى .. لكن حقيقي بفرح لما بشوف اى حاجه بدأتها بتكمل/ بتكبر/ بتستمر/ بتقوى ..الخ - حتى لو مش بنفس التصور
- بعض الاوقات بفكر انى محتاجه اسيب الشغل و اقعد فاضيه رايقه هادية عايشه حياتى .. لكن حقيقي الشغل بالنسبة لى شيئ أساسي
* الشغل هو الحاجه اللى بتفرغ فيها طاقة مخك ..
* الشغل هو الشيئ الحقيقي اللى بيقدم لحياتك قيمة مضافة..
* الشغل هو الملاذ الآمن من كل الآجواء المحيطة..
* الشغل هو اللى بيحميك مادياً واجتماعياً ويساعدك تقدم المساعده لكل اللى حواليك
* الشغل قادر يعالج كل اضطراباتك النفسية والاجتماعيه
* الشغل هو الشيئ اللى بيمنعك من الغضب اللى ممكن يوصلك للقتل :D
ممتنه لكل مكان اشتغلت فيه على مدار ال 10 سنين اللى فاتت 😇
ممتنه لكل شيئ اتعلمته بسبب الشغل
ممتنه لكل شخص قابلته بسبب الشغل
ممتنه لنفسي لإنى مش من الناس اللى بتفضل الإعتمادية
ممتنه لأمى اللى عرفتنى قيمة الشغل
ممتنه لربنا اللى خلقنى بحب الشغل
#30daysofgratitude #gratitudechallenge
ليست هناك تعليقات:
إرسال تعليق