الأحد، 23 مايو 2010

مقتطفات من حوارات مع الوطنى



فجأه و كالعاده يظهر قدامك شخص غير ممنهج لا يمتلك صفه الاقناع ولا العقلانيه فى كلامه و هدفه تحقيق مصالح شخصيه و مستخبى خلف ستار المصلحه العليا مصلحه للجميع .. و يقولك انت غلطـــان
خير يا عم الحاج .. اقنعنى
يدأ كلامه و يقولك جماعه الاخوان المسلمين دول جماعه محظورة
طيب ليه ساعدتهم يبقو اقويا؟ (عشان بيساندوك فى شدتك و ماشين على هواك ؟)
ليه بتسمح لهم يقولولك لأ ؟ ( عشان تثبت للعالم انك ديمقراطى ؟)د
مااااا عليــــــــناااااا

و الجمعيه الوطنيه دى تنظيم سري و عايزين يوصلو للكرسي عن طريق المعارضه و بس
خير يا عم الحاج
انت ايام ما عملت الحزب الوثنى بتاعك مش كنت معارض للنظام الموجود وقتها؟؟
و ايام سعد زغلول اللى عدى ع البيوت بيت بيت و جمع توقيعات ضد الملك و انت بتفخر بيه دلوقتى .. مش كان وقتها بيعمل نفس اللى الجمعيه الوطنيه بتعمله و لا ايـــــه
ماااااااا عليــــــــــنا

الوقفات اللى بتتعمل كلها زعيق و ملهاش علاقه بالناس و كلهم كام عيل فاضي بينزلو يزعقو فيها
لما انت مش مقتنع بالوقفات ليه بعد اغلب الوقفات بتنفذ المطالب المطلوبه فيها؟

و الاضرابات اللى بتعملوها ملهاش لازمه و غير معترف بيها
معاك للاخر يا عم الحاج
هما العمال اللى اعتصمو قدام مجلس الشعب و بعد 64 يوم خدو حقهم من الحكومه و اتعينو و اتوافق لهم على مرتب .. كل دا حصل ليـه؟ مش عشان اعتصمو قدام المجلس؟

دول كل همهم الاعلام و التصوير و اول ما بيشوفو كاميرا حتى لو نايمين و تعبانين و جعانين بيقومو يجرو على الكاميرات
و انت الحزب الواطى بتاعك ولا حكومتك كلها بتوافق على حاجه غير بالاعلام و الفضايح؟؟
هاتلى مشكله واحده اتحلت بدون تدخل الاعلام و نشر المشكله للرأى العام

طب و العيال بتوع 6 ابريل و حركه البرادعى و الاحزاب اللى بيطلعو و يتنططو على اى اضراب كوسيله دعايه رخيصه و يقولو احنا اللى بنحرك الناس .. و بيكونو الناس اصلا معتصمين و مالهومش اى علاقه بالسياسه
طيب لما كل التيارات السياسيه دى غلط و الناس بتتحرك لوحدها يبقي اكيد فى مشكله اكبر بكتيـــر من شويه ناشطين
على كلامك لو مفيش اعتصام مش هيكون فى ناشطين صح .. طيب ليه اتخلق الاعتصام اصلا؟
ثانيا جربت مره تسمع بودنك كلام المعتصمين و طريقتهم و اسلوبهم ؟ ولا بتحكم عليهم من بعيد ؟

اصلا مفيش احزاب معارضه شغاله ولا برامج سياسيه قابله للتطبيق
و انت وفرت لحد جو منافسه شريف و هو ما اشتغلش؟؟
ناسي انك بتحكم من 28 سنه بقانون طوارئ و بلطجيه
ولا ناسي عملت ايه فى ايمن نور لما قدم الدستور البديل و استجوابات للوزراء و اعضاءء مجلس الشعب .. رغم انه كان عضو مجلس مش مجرد شخص معارض
و برغم كده فى مشاريع قوانين كتير معروضه امام مجلس الوزراء و عند مناقشتها بيحذف 70% من المطلوب تغيره و بيضيف ما يفيد بالتحوير فى شكل القانون و لو القانون اتغير فعلا بيكون زى ما حصل فى قانون الطوارئ و تحول الى قانون للارهابين و لم يحدد نوع الارهابين
يعنى بردو المعارضه بتشتغل و انت اللى بترفض المناقشه

بعدين انت اصلا بتطبق برنامجك السياسي الاصلى اللى بسببه انتخبك الشعب؟
حتى البرنامج السلبي المملوء بالسرقه و النهب مش عارف تطبقه .. بتطلب يتقدملك اقتراحات ليه بقي
ماااااااا عليـــــــــنا

دوشتونا بالبرادعى و دلوقتى كلكم مش مقتنعين بيه يعنى اخيرا عرفتو ان جمال احسن منه
اولا حد قالك اننا عاوزين البرادعى .. مش تفهم؟؟
لما المعارضه قالت عاوزين البرادعى كان المقصود عاوزين التغير و لما اتعملت الجمعيه الوطنيه بقي اسمها الجمعيه الوطنيه للتغير مش الجمعيه الوطنيه للبرادعى
يعنى من البدايه الاتفاق على البرادعى كان اتفاق على فكره التغير مش الشخص نفسه
ثانيا لحد دلوقتى محدش قال اننا مش عاوزين البرادعى .. لكن قولنا عاوزين اى شخص يكون بقوة البرادعى سواء كان هو او غيره
ثالثا حتى ((لو)) حصل و المعارضه رفضت البرادعى بعد تأيدها ف دا مش هيحصل الا اذا ظهرت شخصيه افضل و اقوى منه - و دا مش هيحصل الا اذا انت يا نظام حاكم غيرت قوانينك الروبابيكيا

اما موضوع جمال مبارك دا مش انا اللى هارد عليك
و هيرد عليك اللينك دا
http://kashfhesab1.blogspot.com/2008/08/blog-post_4969.html


و اللينك دا هديه منى لكل حد فى الحزب الوطنى
http://kashfhesab1.blogspot.com/
و طبعا باشكر صاحب المدونه ((احمد غانم )) جدااااااااا على مجهوده الرائع

الخميس، 20 مايو 2010

مشاعر و بتحكمنا

علي قد خبرتي المحدودوه جدا قابلت ناس كتير جدا مفيش حد يشبه التاني في حاجه
غير ان دايما بتجمعهم و بتسيطر علي تفكيرهم حاجه واحده . . و هي المشاعر
أيا كانت نوع المشاعر دي حب كره شفقه تعاطف جشع استغلال أنانيه حب ذات حب الناس . . الخ
كلها مشاعر بتتحكم فينا و ترمي صاحبها لطريق يمشي فيه سواء طريق صح أو طريق غلط حلال أو حرام

المشاعر بتتحكم فى كونك تحب الشغل دا و تكره دا
تحب الشخص دا و ترفض دا
تحب اهللك بيتك ارضك بلدك و تكره اعدائك و خصومك و و
و هكـــــــذا

لكن الشيئ الغريب لما مشاعرك تتحكم فى كونك ليبرالى او شيوعى او ناصري او اخوانى او او
لما الاستغلال و الطمع الغريزي يعملوك ليبرالى
و حب ربنا الغريزي يتحول لتشدد و يخليك اسلامى
و حب الناس و اثبات الذات بينهم يحولوك لشخص شيوعى
و حب شخص معين و احترامك ليه يخليك ناصري
و حب الانتماء يخليك قومى
و هكــــــــذا

فى الوقت دا لازم تقف مع نفسك وقفه
و تقرر
اذا كان انتمائك السياسي للفئه دى بسبب مجرد مشاعر؟
ولا دا اقتناع بمبادئ و قيم و افكار

الاثنين، 17 مايو 2010

مليون صوت بيقول لا لغشاء البكاره الصيني



مليون صوت بيقول لا لغشاء البكاره الصيني

دا كان اسم جروب عملته من كام شهر
كان هدفه رفض المنتج دا و اظهار مشاكله و مساوئه و تعريف الشباب بحقهم فى بنت حقيقيه و حق البنت فى شاب حقيقى مش شباب مش فاهم يعنى ايه علاقه صح و كل هدفه جسم البنت
كان ادمن فى الجروب دكتور نساء و توليد و دكتور نفسي و شاب عامل جروب للدكتورة هبه قطب اللى بتتناول اجزاء من اللى كان مكتوب فى الجروب
و كنت باحاول اوصل للناس الفرق بين البنت المحترمه بطبعها و الغير محترمه تتعرف ازاى

اتهمت وقتها باأنى قليله الادب و اهلى ما عرفوش يربونى و باقول كلام يثير الشباب و و و ... و بدات المهاجمات بغيااااااء جداااا
بعض البنات رفضت دخول الجروب عشان قرايبها ما يشوفوش الجروب فى وسط جروباتها
و اغلب الشباب دخلو يشوفو البنت المتحرره اللى بتقول الكلام دا و يا اما يشتموها يا اما عايزينها بعينيهم القذرة

كالعاده التهزيق كان على وول الجروب
و رسايل التشجيع كانت بتيجي مسج ع الخاص
و كان التوبيك اللى اكتبه انا يتهاجم و اللى يكتبه الشباب عااادى جدااا

المهم

غشاء البكاره الصيني انتشر
و اتعمل عنه كتب كتير مكتوب فيها كل المواضيع اللى كانت محل مناقشه فى الجروب
و طبعا لم تهاجم لمجرد ان كاتبها حد معروف (او لان المحترمين و المحافظين مش بيقرو كتب و المنحلين بس هما اللى بيقروها ) مش عارفه بالظبط يعنى

و المهم

الغشاء الصيني الغبي ملأ الاسواق العربيه
و هو دلوقتى بالاسواق المصريه بشكل سري زى الفياجرا و السنافي زمان و شوفو الفياجرا انتشرت ازاى دلوقتى و بقت شيئ عادى

و الاهم

ان مهما الواحد اتكلم و قال الاحترام مش فى نقطتين دم هتفضلو اغبيا و هيفضل التخلف المصري العربي الافريقي سبب فى دخول البلاوى دى مصر

اخر حاجه عايزة اقولها بقي
عزيزتى المنحله : افقدى عزريتك و الصين ترجعهالك
عزيزي الشاب المحافظ : سلملى ع الترومااااى ع رأى واحد

بس بردو انا سعيده جدا بدخوله مصـــرنا العزيزه
لانه جه في وقته وانه لازم بعد ظهوره يتغير مفهوم ان شرف البنت وعفتها موجود في غشاء البكارة من عدمه
يعني خلاص قبل مكانوش راضيين يغيروه وهو بايدهم دلوقتي غصب عنهم هايفرض وجود غشاء البكارة الصيني انهم يغيروا المفهوم ده .


و اشربوووو يا شباااااب

الأربعاء، 5 مايو 2010

العمل فى عيد العمال للعمال فقط



السبت الموافق 2/5 عيد العمال
نزلت الشارع و لقيت ان كل الناس بلا استثناء اجازة
الجامعات و المصالح الحكوميه و الشوارع و كل مكان عباره عن فراغ
لكن
الوحيدين اللى بيتشغلو .. هما العمال
و النهارده عيدهم؛؛؛؛؛
لانه اجازه للناس فالكل عايز ينجز فيه مصلحه
هو مش من حق العمال دول ياخدو اجازة؟؟؟
ليه بنعتبر العامل ضعيف لدرجه ان مش من حقه يرتاح يوم راحته
الفرق بين الموظف و العامل هو العلم
عشان مش متعلم نعمل فيه كده؛؛؛
المفروض ان الغير متعلم و غير قادر على التعليم ياخد حقه فى حاجه تانيه
ليه اسلب منه كل حقوقه
كل ارادته
كل حياته
تانى يوم 3/5 نزل العمال فى مظاهره للمطالبه بحد ادنى للاجور
يعنى هو ضعيف - مفلس - مريض - جاهل - بيعانى من كل شيئ في الدنيا
و فوق كل دا احنا كمجتمع بنظلمه
بنظلمه بسكوتنا عن حقه
و ياريته مجرد سكوت
بنظلمه بوقوفنا ضده - بفرحتنا بعلاوة 10 % واثقين انها ولا شيئ
لو فعلا مش عارفين نقف جبن العامل بكلام ممكن نسكت
و ساعتها السكوت هيكون افيد من الكلام

احنا كده غلطانين؟؟؟




صباح الفل عليكم
تحبو تعرفو احنا عايزين ايه؟؟
احنا مجموعه طلبه من جامعات و كليات مختلفه اتفقنا نصلح جامعتنا

هتسأل ايه الغلط فى الجامعه؟؟

اقولك يا سيدي

1- دى مش مناهج - يعنى لما تتخرج لازم تاخد كورسات عشان تعرف تشتغل بيها
2- دا مش سعر كتاب مدعم - من حقك كتاب مدعم بالكامل
3- دى مش معامل محترمه تقدر تفكر و تخترع فيها - من حقك معامل متكامله
4- دى مش مصاريف مدعمه تدفعها - من حقك دعم كامل على المصاريف
5- حفلات الفنانين اللى بيتصرف عليها قد كده دى مش انشطه كفايه - حقك يكون موجود مجموعه انشطه مختلفه و انت تمارس النشاط اللى يستهويك
6- العياده الطبيه اللى مش بتتفتح - حقك تأمين صحى كامل
7- اتحاد الطلبه اللى متعرفش هما مين اصلا ولا بيعملو ايه - حقك تفهم مين دول و تشارك معاهم
8- من حقك لما ترشح نفسك و تشارك فى اتحاد الطلبه -امن الدوله ما يتدخلش و يوافق او يرفض انك تشارك فيه
9- الانتخابات بتتعمل فى ايام المحاضرات الكتيرة و حقك انها تتعمل في يوم اجازة لفرقتك
10- لو ما كملش النصاب القانونى عميد الكليه بيختار هو رئيس الاتحاد بنفسه ( اللى على مزاجه طبعا ) د
11- الامن اللى واقف فى المدرجات و على باب الكليه دول من الداخليه - و حقك انهم لازم يبقو من امن الجامعه - مش امن من الداخليه
12- تعطيل تعين المعيدين رغم موافقه الاقسام - حقهم طالما اوائل الدفعه يتعينو فورا
13 - ربط سفر هيئه التدريس لمهمات علميه بموافقه الامن - من حقهم يسافرو وقت ما يحبو لان البحث العلمى مش مرتبط بمكان
14- لازم موافقه الامن قبل البدء في بحث مع اجانب - من حق اى باحث انه يعمل بحث مع اى حد بدون حدود

فهمتو؟؟

احنا غلطانين لما نقول الكلام دا غلط و عايزين نصلحه؟؟

يعنى انت موافق على افكارنا ولا رافضها؟؟

طب موافق ليه و رافض ليه؟؟

شاركونا ارائكم
دا حال الجامعات
http://www.march9online.net/htm%20files/March06Abst1.htm
و عايزين نغيره

بس كده

Translate

Related Posts Plugin for WordPress, Blogger...