الاثنين، 26 أبريل 2010

بنعمل كده ليـــه؟؟


لما بننزل بمظاهره او نعمل معرض او حملات توعيه سياسيه بنلاقى تعليقات بجد تشجع و تعليقات تانيه زى :-


- دول شويه عيال فاضين مش لاقيه حاجه تعملها
- اشغلو نفسكم بحاجه تنعفكم بدل اللى انتو بتعملوة دا
- دول بيعملو لنفسهم بروباجندا و عايزين يلفتو الانظار
- دول ضحيه سياسيه و مش فاهمين حاجه
- ابعد عنهم يا عم لتروح معاهم فى داهيه
- مهما عملتو مفيش حاجه هتتغير و النهايه معروفه

طيب لما احنا كده
تفتكرو ليه بنفكر و نتعب و ننزل و نعرض نفسنا للتحقيقات و المراقبه و امن الدوله و فتح ملف سياسي و فصل او سقوط فى الجامعه و تهديدات و و و و احنا عارفين كل دا؟؟؟؟؟

ببساطه
عشان احنا مقتنعين باللى بنعمله
عشان هدفنا ثابت و لازم يكون دا هدف الكل مش هدفنا لوحدنا
-احنا كلنا طلبه جامعه و عندنا حياتنا الخاصه - يعنى مش فاضين - لكن السياسه كمان جزء من حياتنا ما ينفعش نفصلها عن حياتنا - لان تأثيرها علينا بيكون بطريقه غير مباشره احنا مش فاهمينها
- لو هدفنا هو بروباجندا يبقي اسهل نوصل لهدفنا بعيد عن السياسه و وجع الدماغ - لان قلق السياسه و ضررها اكتر بكتيييييييير من نفعها ومفيش اسهل من طرق الشهره
- مش معنى اننا بننزل مظاهرات او بنعمل حملات توعيه يبقي هنروح فى داهيه - احنا كل هدفنا اننا ناخد حقنا و حق كل حد مش عارف ياخده - وحتى لو حد فينا اتاخد فى يوم - دى الضريبه اللى لازم تتدفع عشان تكسب فى النهايه
- الضحيه السياسيه هو الشخص اللى قاعد فى بيته بدون فهم - مش اللى بيسعي لانه يفهم و يفكر و يطور عقله بدل ما يبوظ من الركنه
- لو احنا مش مقتنعين بان فى تغير هيحصل عمرنا ما كنا هنتحرك و نتعب و ندور و نتكلم عشان نقنع حد تانى
- و لو كل حد فقد الامل فى التغير للاحسن يبقي عمر الاحسن ما هيحصل ابدا

و هاقولكم مثال بسيط جدا
لو فاكر ايام ابتدائي كان الدسك الاول فى الفصل بالنسبه لك يمثل ايه
-تخيل انك قاعد فى اول دسك و مقتنع تماما انك تستحق تقعد فيه و واحد وراك قرر يقولك لا انت لا تستحقه لاسباب (كذا و كذا و كذا) و لازم تقوم منه .. ياترى هتقوم؟؟ ... اكيد لا
-طيب لو الواحد دا قال لصاحبه و صاحب صاحبه و كل اللى حواليه و عرفو انه فعلا لايستحقه و لقيت ان النص الاخير فى الفصل كلهم بيقولولك قوووم .. ياترى هتقوم؟؟... اكيد لا .. لكن هتتـهز
-و لو لقيت ان نص الفصل قال للنص التانى و كل الفصل بيقول لا انت غلطان ولازم تقوم - ماعدا كام واحد منتفعين من مكانك قدام وساندينك .. ساعتها بس هتتطر تقوم و تروح اى مكان
لان دى قوه الاغلبيه - الكل فهم و اقتنع- فــقدرو يحركوك من مكانك

حتى لو ما اتحركتش
ساعتها تقدر تروح للمدرس و الناظر و المدير و الاداره التعليميه كلها و تقول الطالب دا مش مكانه فى الدسك الاول

فى وسط الدوشه اللى الطلبه اللى ورا عاملينها لازم الطالب اللى فى الاول يدافع عن مكانه - فاقل واجب انه يضرب اللى ورا باى حاجه فى ايده
و ممكن تقع اصابات و حالات وفاه كمان - لكن النهايه المؤكده؟؟ انه لازم هيقوم من مكانه دا

اهو الرئيس السابق مبارك ان شاء الله موجود فى نفس مكان الطفل اللى فى الدسك الاول
و بيتصرف نفس تصرفاته و الشعب باقى الفصل


هو دا اللى احنا كطلبه بنسعى ليه
لما بننزل بمعرض او حملات توعيه او مظاهره او او.. دا بيساهم فى اننا نوصل صوتنا لكل الناس و غيرنا يفهم و يقتنع انه مهما كان ضعيف هو ليه دور و هيبقي قوى لما يقف مع مجموعه
و كل ما المجموعه تكبر و الفصل يفهم ساعتها هنعمل اللى احنا عايزينه و بس .. مش اللى هما عايزننا نعمله

صحيح بتمر علينا اوقات تعب كتير و اوقات احباط و و و .. بس لاننا لينا هدف حقيقي هو اللى بيحركنا عمرنا ما هنتعب او نسكت على حقنا

الاثنين، 19 أبريل 2010

رأيي و انا حره فيه



مؤخرا كل ما حد يكلمنى يقولى يا بتاعت البرادعى .. او البرادعى بتاعكو .. او يا بتاعت 6 ابريل
فى ايــــــــــــه؟؟؟؟؟؟
حد سألنى عن موقفى من البرادعى او 6 ابريل او مجلس الشعب او او او ؟؟؟؟
انا لا أؤيد اى حد او اى جهه و غير منتميه لاى حزب او تيار

و رأيي فى الناس دى باختصار

حسنى مبارك
لو هو شخصيه متزنه مكنش وهم الكرسي و السلطه تمكن منه .. و كان صحح اى خطأ شايفه .. مش مجرد ان البلد مفيهاش حرب يبقي كله تمام ... و طالما هو شخصيه غير متزنه يبقي ما ينفعش يكمل
من رأيي : مبارك يكون وزير للخارجيه .. ساعتها هيفيد اكتر

جمال مبارك
لو من المفترض اننا نرضي بالامر الواقع عشان حد كبييير يعيـــــش احسن مننا .. هنوافق عليه
جمال لو لمس الكرسي هيسيطر عليه وهم السلطه زى الوالد العزيز .. و هياخده تقضيه مصالح و حفاظا على ماء الوجه ليس الا
و وجوده فى لجنه السياسات موضوع مهم مش فاهمه مهمل ليه؟؟

البرادعى
شايفاه راجل مدير ناجح.. مش واثقه فى كونه هيكون رئيس ناجح .. لكن هو الوحيد اللى الحكومه بتعتبره اقوى منها و يقدر يقف قدامهم لحد ما نوصل لقط معينه و هى تعديل الدستور و تغير فكره التوريث و و و
ف ايه المانع يكون رئيس و لو لفتره واحده .. و يوم ما يرفض مطلب لينا نحركه من مكانه

ايمن نور
نور شخص متميز فى التفكير و الاداء و له شعبيته .. و كفايه اوى الدستور البديل و الاستجوابات لاعضاء المجلس اللى عملها قبل ما يبدأ انشاء حزبه .. لكنه حاليا بعد ما تعرض له من ايذاء نفسي و جسدى و.. و .. مش هيقدر يواجه الحكومه بقوتها ..
لكن ممكن يكون رئيس للوزراء .. يختار وزراء جداد يمشو البلد صح

عمر سليمان
رئيس جهاز المخابرات الحالى .. يعنى الايد اللى بتدى الحكومه تقارير تؤمر بالقمع و السحل .. يعنى حكومته هتكون نسخه من الحكومه الحاليه

عمرو موسي
ولائه الاول و الاخير للحكومه المصريه اللى اعتطه الحق و الفرصه فى انه يتولى كل هذه المناصب

حمدين الصباحى
ما ننكرش انه شخص فاهم - لكنه ايضا غير قادر على المواجهه مع الحكومه

رفعت السعيد
بيعتبر تعديل الدستور الحالى شيئ غير واقعى .. عايزينى اوافق يكون رئيس ازاى؟؟



مجلس الشعب
كله نفاق و تزوير و تقضيه مصالح و ضحك على الدقون و و و و

الحزب الوطنى
نادى كبار التجار لتحريك السياسات المصريه من خلف ستاير سودا واللى بنشوفه قدام الستاير دى هى الكورسات و حملات التوعيه المموله تمويل اجنبي و و و

الاخوان المسلمين
جهه منظمه جدا .. تستعمل ايديولوجيا قديمه و غير مرنه .. تستغل الدين لتنفيذ سياسات غير مقنعه فى ظل التطور الموجود .. تعتمد على اللاهدف لتشكيل هدفهم فى عقول صغار السن


6 ابريل
رغم انى اعرف كتير من شباب 6 ابريل و بحبهم شخصيا جدااا
لكنهم شباب مهرجلين و غير منظمين و دا لان مفيش شخصيه كبيره و محترمه واقفه معاهم و بيساندهم بافكاره
لكن رغم كده دا اقصي مجهود يقدرو يبزلوة فى تحقيق اهدافهم و فى حدود امكانياتهم
و الكلام دا ينطبق على كل الشباب اللى عايزين يغيرو اى شيئء فى بلدهم


ارجع و اقول
انا لا انتمى لاى جهه او حزب او تيار
لكن عندى استعداد اشتغل مع اى حد بيشتغل لصالح بلدي




كل الناشطين زى الصورة دى
ورده فى وسط صحرا متدمرة

كلمين لناشطين



فجأه تلاقى الفيس بوك كله مبسوط و فرحان و مزقطط
و فجأه تلاقى الناس كلها مخنوقين و مكتئبين و عندهم هم الدنيا

وفجأه تلاقيهم هما نفسهم بيجرو جرى ورا حد او حاجه او هدف او او
و فجأه تلاقي نفس الشباب بنفس الحماس اتحول للعكس تماماااا و بقو ضده

كلامى ع الناس عموما
و بصفه خاصه الناشطين السياسين

انتو ليه كده؟؟
او احنا ليه كده؟؟؟؟؟

عارفين ليه؟

لان اصلا معندناش هدف واحد ثابت صح بنسعى ليه
عشان بنطلع كل مشاكلنا النفسيه و الكبت اللى جوانا فى نشاط مش بتاعنا
عشان بنعلق فشلنا فى حياتنا عموما على نشاط مش بنعمله اصلا
عشان احنا ولا دارسين ولا فاهمين عشان نعمل حاجه صح
عشان احنا اضعف من اننا نواجهه حد يقولنا لا
عشان فرحانين بالاعتقلات و المظاهرات و الخناقات اللى بنثبت فيها نفسنا
عشان مش لاقيين نفسنا ف حاجه تانيه ف قولتو قشطه السياسه موجوده
عشان مش شاربين سياسه من صغرنا و متربين عليها و عارفين انها ممله و رزيله

هى دى السياسه؟؟
كلمه تودينا و كلمه تجيبنا؟؟

ما هو لو كلامى دا مش صح يبقي هتفضلو ثابتين على موقفكم
هتبقو قادرين تقفو قدام اى حدث و اى حد يعارض و اى حد يضعفك او يكسر مقاديفك
لكن انتو فعلا مشتتين و مذبذبين و ضايعين و ضعاف و مش فاهمين
و انا اولكم .. و مش لوحدكم

بس بجد

اللى مش قد السياسه يسبها لأصحابها
اللى مش عارف ان السياسه ممله و محبطه يسيبها لأصحابها
اللى مش عارف ان اخوة ممكن يتاخد و اخته تتبهدل ف الشارع و هو مش قادر يعمل حاجه يبقي يسيبها لأصحابها
اللى مش عارف ان كلاب الدوله اقوى منه يبقي يسيبها لآصحابها
اللى مش عارف ان اقرب الناس ليه ممكن يبعدو عنه بسببها يبقي يسيبها لأصحابها


لو عارف كل دا و موافق

يبقي تفضل على هدفك و مبدأك و اوعى تتخلى عنهم
يبقي تفصل بين السياسه و حياتك العاديه
يبقي يشتغل و ينسي كلمه احباط - يخرجها من قاموسه
يبقي قول افكار جديده بدل الافكار الغلط اللى بيتم تنفيذه

الأحد، 11 أبريل 2010

الناشطين زى سواقين الميكروباص


ناشطين الايام دى مش فارقين كتير عن سواقين الميكروباص
يجي السواق من دول و يركن جنب الظابط
لما الظابط يتكلم يتخانق معاه و يقوله يلعن ابو دى حكومه
و يجي الزبون يقرب من العربيه فينادى ف ودنه كأنه مش عارف ان ههو دا طريقه
يقوم الزبون يشوف الخناقه مع الظابط فيخاف و ينزل من العربيه
و مفيش زبون واحد بعده يبقي عايز يقرب من العربيه
و ينسي السواق ان فى زباين اصلا واقفه الناحيه التانيه خايفه تقرب
و ينسي كمان ان فيه زباين مش عارفين الطريق دا هيوصلهم مكان ما هما عايزين ولا لا
و ينسي بردو ان فى زباين مش عارفه ان فى طريق صح اصلالالا




الناشطين بقي
يجي الناشط من دول و يتكلم فى الموبايل و الحزب و و اللى عارف انهم متراقبين
لما يتقبض عليهم يهزق فى الظابط الصغير و يسيب الباشا الكبير
يجي حد جديد عايز ينضم لمجموعه الناشطين دول - يهتمو بيه كأنهم مش لاقين حد
و كل يوم رنات و رسايل و مواعيد كأن مش هو اللى اختار طريقه و متابع كل التحركات
و لما الناشط الجديد يشوف القديم مش بيعمل حاجه اكتر من جعجعه فارغه يبعد عنهم
و كل الناشطين الجدد يخافو ينضمو او يلاقو ان مفيش فايده للانضمام
و ينسي الناشط القديم ان فى ناشطين جداد ممكن يكونو احسن منه مش عارفين يقربو
او مش عارفين الطريق
او خايفين
او او او او



نيجي بقي فى فاعليه مهمه
ما نلاقيش ناشطين جداد
و الجديد اللى نفسه يعمل حاجه ما عرفش ان فى حاجه بتتعمل اصلا


هوووو دااااااا حالنا يا ناشطين مصر


انا عارفه انكو بتبزلو قصارى جهدكم
بس فى ناس كتير جداد عايزين ينضمو لكم
و صوتكم مش واصلهم
مش واصل غير للى حواليكم
غير للى جالك برجليه و قالك عايز انضملك


ما فرقناش كتير عن سواق الميكروباص الغبى


صباحكم فل يا ناشطين يا غالين

سيبونا


لما الطفل الصغير بيفكر فى فكره و بتدخل دماغه و يؤمن بيها حتى لو كانت فكره تافهه ممكن يعمل اى حاجه عشان يحولها لواقع و يقنع بيها كل اللى حواليه - رغم ان اللى حواليه دايما بيكونو اهله اللى اكبر منه و خايفين عليه
و فاكرين ان خوفهم دا هو اللى بيحميه
و طول ما هو قاعد فى بيته بعيد عن الشارع يبقي فى امان
نسيو ان التليفزيون و النت و الكتب و الثقافات التانيه قدامه و سهل اوى يعرف ان فى الدول الاوروبيه الطفل فى سنه بيخرج و يجرب بنفسه و يتكلم و يقترح نظم جديده و يغير بايده
و كمان بيختار اسره بديله يعيش معاها

اهى الحكومه عملت زى الاهل بالظبط لكن على نطاق اوسع و اشمل
و افتكرت انها بالتخويف و الضرب و الاهانه هنخاف و نقول احنا غلطانين و نرجع فى بيوتنا و نقول اهى عيشه و السلام

و فاكريننا
زى ما بنقول دا ابويا اللى ربانى و دا احسن اب فى الدنيا و اتغاضى عن عيوبه و اخطائه و استحمله و خلاص
هنقول دى حكومتنا الحلوة بعيوبها و اخائطها و اهى عيشه و السلام

سيبووووووووووووونا
سيبونا نفهم بلدنا فيها ايه
سيبونا نقول اللى مش عاجبنا
سيبونا نتكلم بعقلنا مش عواطفنا
سيبونا نتمرد و نعترض و يبقي لينا حق نتكلم
سيبونا نعمل مظاهره عشان تعرفو انكم غلط
سيبونا نمارس حقنا اللى كل الناس بتمارسه فى اى دوله
سيبو الامن اللى بيجرنا من قفانا يفهم هو بيجرنا ليه
سيبو الصغير يقول رأيه - مش لازم يبقي كبير عشان يتكلم


سيبونا نقول افكارنا و اسمعوها و افهمونا و نفذوها
يمكن احنا اللى عندنا حق


سيبونا نفكر بحريه
من غير سموم مدسوه فى افكارنا

الخميس، 1 أبريل 2010

سيناريو عضويه المجلس العقيم



كل واحد فينا احنا يا بشر ملناش لازمه ليه قصه و حدوته
فما بالك باللى بيكبر و يكبر لحد ما يبقي عضو ... فى اى مكان بقي ...و خصوصا مجلس الشعب

كل عضو منهم ليه قصه فساد تتدرس في المدارس
تزوير - سرقه - نصب - مخدرات - بلطجه .... و كل سمات الحزب الوطنى
و عشان كده بيوصلو و يبكبرو و يظهرو فى عتمه الضلمه

لما بيظهر حد و يقول عايز ارشح نفسي لمجلس الشعب فى محافظه كذا محدش بيقوله انت مين و جيت ليه و كنت فين و تاريخك ايه
لأ .. بيسألوة انت حزب وطنى ولا معارض؟
و على الاساس دا بيشوفو مصالحهم فين و يقفو معااه
لا حد بيسأل دا خريج ايه ولا كان شغال ايه

قبل الانتخابات
بيتقسمو البشر لانواع
ناس قاعده فى البيت كافيه خيرها شرها
و ناس بتشوف مصلحتها فين و تمشي وراها
و منافسين بيدمرو فيه و يقفو قدام كل خطوة بيعملها
و الغلبان اللى بيدور على مصلحته مش بيعجبه حد و يقاطع الانتخابات


و بعد ما تخلص الانتخابات
اللى قاعدين فى بيوتهم .. مش بيعرفو ان كان فيه انتخابات اصلا
و اصحاب المصالح .. بيدورو على الناجح عشان ينافقوة
و المنافسين .. يقربو منه على قد ما يقدرو عشان يعرفو يلدغوة
و الغلبان .. يقعد يتفرج و يحاول يتحرك و ما يقدرش كالعاده

و بعد سنه
المنافس يشوف شغله
و تظهر فضايح النائب
و اللى قاعدين فى بيوتهم .. يلاقو سيره يتسلو بيها
و اصحاب المصالح يبعدو عنه و يدورو على مصالحهم مع مين
و المنافسين .. يفرحو و يشمتو طبعا
و الغلبان يقول انا قولت و محدش سمعنى


و فى الاخر
اللى قاعد فى بيته يقول .. ياريتنى اتحركت بدل ما اتبدست فى واحد ما اعرفوش و بلاويه صابتنى انا
و اصحاب المصالح ... يجرو على اللى اكبر منهم و يقولو اسفين .. دا ضحك علينا
و المنافسين .... يستغلو الفرصه و يروحو لكبيرهم و يقولو .. شوفت يا باشا الفرق بينه و بينى (و هو عارف ان مفيش فرق اصلا)د
و الغلبان يقول .. ياريتهم سمعو كلام الغلبان اللى صوته اتنبح و قال ان النائب دا مش تمام



كل دا ليـــــــــــــه؟؟؟؟؟؟؟
عشان من الاول
اللى قاعد فى بيته كان سلبى
و الغلبان خاف يطور الموضوع و يثبت كلامه
و المنافس مش هاممه غير الكرسي
و اصحاب المصالح ما يهمهومش غير فلوسهم


خلونا سلبين كمان
سيبونا نبقي ضعاف لحد ما ننداس

Translate

Related Posts Plugin for WordPress, Blogger...