لكل مؤيد لمبارك بعد خطابه الاخير

اصابتنى الدهشه عندما وجدت بعض اصدقائي الذى من المفترض انهم يعلمون مدى ما يعانيه الشعب المصري و اخرون ممن لا يعلمون شيئا عن المسئوليه او الظلم او اى شيئ سيتعرضون له

فى يوم ما .. ان يتبنون وجهه نظر تأيد مبارك بعد اعلانه تلبيه مطالب المعتصمين

و حبيت ارد ف شويه كلام

هتقولى الخروج على الحاكم حرام ؟ هقولك القرضاوى و محمد حسان و الخميني حبايبك كانو من دعاه الشعب المصري للثورة

هتقولى المخرج الدستورى ؟ هقولك مالك انت ومال الكلام دا انت من امتى بتفهم فيه .. سيبه للى فاهم وهما يقولولك ان فى عشرين مخرج دستورى ملهومش علاقه بالمشاعر .. لو اتكلمنا لغه اللى مش فاهم هيقولك دلوقتى فى نائب للرئيس و لو مش عاجب في رئيس المحكمه الدستوريه .. الدستورمن الشعب و لتحقيق مطالب الشعب

هتقولى انا ما اعرفش رئيس المحكمه الدستوريه ؟ هقولك معرفته مش هتفرق كتير دا حد هتكون مهمته فتره انتقاليه بس يعنى موجود لحفظ الامن مش اكتر .. انت لو شغال ف محل و جه صاحب المحل قالك انا رايح مشوار خليك قاعد مكانى و جيت انت قعدت تقدر تاخد قرض باسم المحل او تبيع و تشترى بسعر غير اللى انت واخد الاذن به من صاحب المحل؟؟ اكيد لا و لو صاحب المحل دا مات انت هتستنى الوريث الشرعى .. اللى هو رئيس الدوله الجديد

هتقولى الفوضى اللى هتحل البلد ؟ هقولك لو مبارك مات قبل ما يعيين نائب له حقيقي كانت هتبقي فوضى !! .. مفيش ثورة بتنتهى بفوضى لو مش فاكر اقرا كل ثورات مصر و مظاهراتها الكبيره .. و الله يرحم كل الرؤساء و الملوك

هتقولى الخراب و السرقه ؟ هقولك دول بسبب الريس اللى انت عايزة .. ارجع لايامك العاديه بعد الثورة و هتلاقى نسبه السرقه و الخراب هترجع نسب طبيعيه بسيطه جدا و لافراد مشتته و ليست تنظيمات مرتبه ولها قوادها

هتقولى عايز امان ؟ هقولك كلنا عايزين امان فى حياتنا كلها ولكل الناس مش ليك بس .. عايزينه فى الشغل و البيت و الاستقرار و دا مكنش حاصل اصلا عشان يرجع

هتقولى ارجعو البيوت حقنا لدماء الناس اللى ماتت ؟ هقولك اسهل من ان الناس ترجع بيوتها مذلوله و مهان كرامتها ان الرئيس يسيب منصبه و تتحل الازمه

هتقولى عاجبك وقف الحال مفيش شغل و الناس مش عارفه تقبض ؟ هقولك لو 5 مليون مش عارفين يقبضو شهر انزل التحرير و كل اماكن الاعتصامات و شوف الناس اللى بقالها سنين لا عارفه تشتغل و لا عندها قبض تعتمد عليه .. كل واحد من المعتصمين فى التحرير وراه قصه ظلم لو انت اتعرضت لها مكنش هيكون دا موقفك

هتقولى ما المتظاهرين نزلو ولعو فى الاقسام و مقرات الحزب الوطنى ؟ هقولك ببساطه الاعمى ممكن يعرف ان اللى ولع فيها هم بلطجيه نواب الوطنى اللى بيستعينو بيهم فى الانتخابات و تقدر تتاكد اكتر فى المحافظات لانهم بيكونو عارفين كل الاشخاص الموجودين فى القريه .. و حرقوها عشان يخفو اى مستندات تدينهم زى خطه مواجه الاحتجاجات الكبيره اللى تم تسريبها

هتقولى غلاء الاسعار لاستغلال الازمه ؟ هقولك بطل استهبال انت فى الايام العاديه بتشترى كل حاجه باضعاف اسعارها المفروضه بسبب التضخم اللى ما تعرفش عنه حاجه .. تصبر يومين على الغلا ولا تتكوى به العمر كله!!

هتقولى خساير البورصه فى يومين ضيعت ارباح السنه اللى فاتت ؟ هاقولك اللى خسر فى البورصه النهارده بعد الثورة هيكسب اضعاااف ما خسر بسبب النشاط الاقتصادى اللى هيكون موجود نتيجه التعمير اللى هيحصل.. و اسال اى محلل اقتصادى

هتقولى خساير الدوله بقت مليارات بسبب الاعتصام دا ؟ هقولك بعد تنحيه مبارك هيكون فى محاكمات لكل الحراميه اللى سرقونا و منها هترجع فلوسك و فلوس الدوله المنهوبه و تقدر بيها تصلح الخساير و تبنى الجديد .. بس ياريت ما تقفش فى طريق اللى هيطالبو بالمحاكمات العادله

هتقولى اديله فرضه تانيه ؟ هقولك هتاف بيقولوه فى الاعتصام(ادولو فرصه تانيه يسرقنا مره تانيه) لو اخد فرصه تانيه هيظبط اوراقه و يزور الانتخابات الجايه لصالح عمر سليمان ابن النظام اللى هتكون قبضته زى مبارك او اقوى و يفضل نفس النظام الحاكم بعد تغيير الاشخاص

هتقولى سيبوة يكمل مدته ويرجع البلد زى ما كانت؟ هقولك هو عايز يكمل مدته عشان يخرج منها رئيس زى ما كان .. اللى يخون شعب كامل طول 30 سنه سهل يخون فى كام شهر و اللى مقابل خوفه على منصبه يقتل و يزور و يعتقل و و ممكن يعمل اى حاجه تانيه

هتقولى ما هو لازم يخرج منها رئيس مالى مركزة زى كل رؤساء مصر ؟ هقولك هو لو يستاهل ماكنش اتهان كل كم الاهانه دى من الاصل .. زعلان على مشاعره و مش زعلان على اكتر من 300 شهيد و 5000 مصاب فى مظاهرات سلميه!!غير الالاف بيموتو كل يوم من مليون سبب اتسبب فى وجودهم

هتقولى مينفعش نغلط فى ابونا قدام الاجانب ؟ هقولك لو ابويا دا قتل اخواتى فى العبارات و القطارات و الامراض و الفتنه و البطاله و الجهل وووووو والاجانب عارفين كل دا اكتر منى يبقي انا مش باغلط فيه انا باخد حقي منه .. بعدين ما قدامكم اهو كل رؤساء امريكا بيدخلو الرئاسه و يخرجو و رغم اخطائهم الشعب بيسامح

هتقولى انا عايز التاريخ يكتب ان كل رؤساء مصر خرجو منها معززين ؟ هقولك احنا مش بنزل حد هو بس يتنحى و احنا نضرب له 21 طلقه زى ما عملنا مع الملك فاروق بالظبط

هتقولى المعتصمين مطالبهم كتير و مش هتتنفذ مهما قعدو كده ؟ هقولك بقالنا 5 سنين بنعمل مظاهرات بنطالب بالمطالب اللى تم تحقيقها و يطلع اللى يقول مش هتتنفذ .. لكن مع اصرار الناس اهى كل مطالبنا اتنفذت .. لو مش هتطلب حقك ما تحبطش اللى بيطلبهولك

هتقولى التغيير مش بيبقي فى يوم و ليله؟ هقولك احنا بقالنا 30 سنه بنسمع فى وعود مش بتتنفذ و افتكر اول ما تولى الرئاسه وعد الشعب بفترتين اتنين و ما شاء الله بقو خمسه فى عين العدو

هتقولى احنا بقينا فريقين مصريين يقتلو فى بعض ؟ هقولك لا دا فريق مئات و فريق ملايين .. المئات لما يعتدو على الملايين يبقي دول مش مصريين دول مبرشمين (ابتريل) و لو مش عارفه دا نوع من المخدرات اللى بتخلى الانسان فى قمه حالات الهياج الجسدى فيعمل اى حاجه بدون ما يفكر .. تانى حاجه بطاقات اللى تم القبض عليهم و كارنيهات الحزب الوطنى معاهم مش هتكدب .. و عايزة اقولك انك لو نزلت التحرير هتلاقى قمه التعاون و الحب و الاخاء و التكافل الاجتماعى مش سرقه و تحرش و ضرب ووو ..و المتظاهرين حافظو عليها سلميه على قد ما عرفو

هتقولى فى ناس محترمه نزلت مظاهرات نعم لمبارك فى المهندسين؟ هقولك دول المنافقين يا حبيبي اللى عايزين النظام يفضل ثابت عشان تثبت معاه استثماراتهم و وظائفهم .. طب ليه لم يثبتو على مواقفهم زى المناهضين للرئيس و ما فضلوش ايام معتصمين !!

هتقولى طب كفايه الايام اللى فاتت ونهدى الجو شويه ؟ هقولك ليه المظلوم هو اللى دايما لازم يسكت على حقه و يرجع بيته مقهور و متهانه كرامته ويسيب فرصه للظالم يتربع على عرش الظلم!!

هتقولى قناه الجزيره اللى وثائق ويكيلكس اثبتت انها ضدنا بتثير الفتنه ؟ هقولك لو نزلت الشارع فى كل المحافظات مش التحرير بس هتلاقى ان الجزيره بتنشر اقل من الحقيقه .. ولو هى مش قناه صادقه مكنش اكتر من 17 قناه اعطو لها بث مباشر لتنشر محتواها وكانو خافو على سمعه قنواتهم

هتقولى مبارك خايف من ان الاخوان يستولو على الحكم ؟ هقولك على اساس ان باقي الشعب عيال!! الاخوان لو اصبح فى ايدهم الحكم هيكون السبب الوحيد هو اختيار الشعب لهم و وقتها مش من حق اى حد يتكلم غير كده مفيش سبب تانى يوصلو به الى الرئاسه او حكم الدوله

هتقولى ما هو اعترف بمطالبكم و نفذها ؟ هقولك الريس بتاعك ما عملش كده غير بنزول الشباب للشارع ما احنا بقالنا سنيين بنقول مطالبنا دى بالذوق و الادب و القضايا فى المحاكم تشهد وسلالم النقابه اللى شبعت مظاهرات .. جاى يعترف بيها بعد ما عرف انه لا مفر!!

هتقولى ما هم وقفو احمد عز و بعض الوزراء من السفر و احتجزو اموالهم فى البنوك ؟ هقولك اولا دا بعد ما تم تهريب الجزء الاكبر من الاموال دى .. ثانيا دول اسمهم كبش الفدا اللى يحط لك كبش عشان يفدى قدامه خمسين .. ثالثا لو ثورتنا ما كملتش للنهايه القرارات دى ستنقلب الى افراج عن الاموال و اعتزار لهم عن سوء ظن النائب العام بهم

هتقولى بقي 10 مليون فى الشارع هيغيرو مصير دوله فيها 70 مليون غيرهم ؟ هقولك لو مش مكفيك 10 مليون مظلوم بيدورو على حقوقهم روح بلد تانيه احسن .. و للعلم ال 10 مليون دول هم الشباب الواعى اللى عنده مسئوليات و عانى من الواقع مش اطفال او نساء او شباب مش متحمل المسئوليه

هتقولى لو مبارك ما نفذش نرجع تانى ؟ هقولك لو لم تتم ثورتنا الى النهايه فالجيل دا مش هتقوم له قومه تانى لانه هيفقد الامل فى التغيير ولان مفيش اى قوة هتقدر تمنع الداخليه من انهاتسيطر على الشباب قبل ما يفكرو اصلا

هتقولى المعارضه ضعيفه و مش شايفه مطالبنا ؟ هقولك دا لان الناس هى اللى بتقوى الاحزاب او تضعفها.. انت ما تعرفش حاجه عن المعارضه اصلا .. اقرا كل البرامج لكل الاحزاب و اكيد هتلاقي اللى تقتنع به و يناسبك .. و هتلاقى فيهم بديل للحزب الحاكم و هتلاقي اللى يدورلك على حقوقك لو انت مش فاضي تدور عليها


هتقولى مين البديل ؟ هقولك مش انا اللى هاقولك البديل .. فى اكتر من لجنه حكماء و فى مفكرين و علماء و فلاسفه و كتاب و و و هتشوف برامجهم و تختار بينها

هتقولى دسائس خارجيه : قطر و حماس و ايران و حزب الله و امريكا ومعرفش مين ؟ هقولك ماشاء الله على بلدنا اللى جمعت كل الوحشين .. لو بطلنا نظريه المؤامرة افتكر هنقدر نحل مشاكلنا .. لو هما فعلا ما صدقو مسكو علينا ذله ف العيب في اللى سابهم يمسكوها من الاول

هتقولى كنتاكى اللى بيتوزع و معاه 50 دولار ؟ هقولك هو كنتاكى هيكفى كل الملايين دى و هيغطى كل المحافظات كده!!! ما انا كل يوم و التانى فى التحرير ما شوفتش غير الاهالى اللى بتوزع الاكل البيتى و الميه من اللى بيتسقي بيها الزرع يعنى

هتقولى الاجانب اللى بيوزعو منشورات على الشباب فى المهندسين ؟ هقولك اصل اللى بيعمل حاجه بيفتكر الناس كلها زيه .. شوف مين اللى اشاع الخبر دا و اسال عن ماضيه الاسود فى الاستقواء بالاجانب

هتقولى البرادعى عميل الامريكان و نور عميل البتنجان ؟ هقولك وهو مبارك مش عميل ولا هنستهبل كتير !!.. لما يبقي فى انتخابات ما تختارهوش يا سيدي و ابقي اختار اللى انت عايزة





هسألك انا بقي

لو اخوك انتحر عشان مش لاقى شغل .. أو عمك مات فى عباره او قطر .. او اختك جالها اكتئاب حاد بسبب العنوسه .. او انت قررت تتجوز و مش لاقى فلوس .. او ابنك تعبان ومش عارف تعمل له عمليه خطره فورا .. او او او ... هتكون على نفس موقفك دلوقتى ولا هتطالب الحكومه بحقوقك عندها؟؟

انت بتدورعن الاستقرار و الامان دلوقتى .. طيب فى حاله تغيير الرئيس لاى سبب كان و لنفترض وفاه حدثت بدون ترتيبات هيكون فى استقرار و امن؟؟

لو شباب التحرير رجعو بيوتهم النهارده بدون تنفيذ مطالبهم كامله تفتكرو هيقدرو يحاسبو الرئيس لو بعد 6 شهور قال انه كان لا ينوى ترشيح نفسه مره جديده ولكن الشعب طالبه بالترشيح و طبعا هتكون مناورة جديده؟؟

تفتكرو هنقدر نعمل محاكم شعبيه ترجع حقوقنا من كل حد سرقنا ؟؟ هنقدر نحاسب الرئيس نفسه على اخطائه كل السنين اللى فاتت فى حقنا وحق كل اللى ماتو؟؟

احنا دلوقتى بعد ما حطم مبارك و نظامه كل سبل التعلم و معرفه شئوننا السياسيه و دمر شبابنا فكريا هنقدر نغير و نحط نظام اصلاحى اقتصادى اجتماعى سياسي جديد بدون مساعده الاحزاب اللى عندها افكار و برامج و خبرة فى المجال دا ؟؟

تفتكرو الحكومه اللى بقالها 30 سنه بتخرب ممكن تصلح كل اللى خربته فى اقل من 200 يوم؟؟

تفتكرو ايه ممكن يحصل لكل حد كان سبب فى قيام هذه الثورة من قريب او بعيد اذا لم تتم الى نهايتها .. كام ضحيه جديده سيتم اعتقالهم ومطاردتهم من امن الدوله .. و افتكرو المعتقلين من ايام السادات لسه منهم كتير فى السجون لحد النهارده؟؟

تفتكر ان ممكن شخص محترم يشتغل تحت ايد شخص عمل كل اللى عمله مبارك فى حق شعبه؟؟

تفتكرو لو سيبناله فرصه الكام شهردول و ما عملش المطلوب منه و فكرنا نعمل ثورة تانيه .. موقف الداخليه وقتها هيكون ازاى؟؟


كلمه حق

شباب و مسنين واطفال وعائلات التحرير ليسو مخربين .. لكن كل منهم وراه قصه ظلم حقيقيه هى السبب فى خروجه و استمراره في الاعتصام .. ياريت نحس بيهم و بدل ما نطلب منهم ايقاف الاعتصام نطلب من الحكومه التنحى وكفايه لحد كده