الموضوع مش احباط او اكتئاب او تشاؤم او اى حاجه .. الموضوع دا انا بفكر فيه
وبجد بجد بجد نفسي أعرف .. مين هيمشي في جنازتى؟؟
لنفترض انى هموت النهارده .. و لنفترض انى هموت موتته ربنا عادى كده ياتري مين هيمشي في جنازتى؟؟
أهلى ؟ و طبعا هيكون تقضيه واجب .. و اللى هيقضى واجب انا مش عايزاه اصلا
إصحابي؟ و هيعرفو منين اصلا .. اكيد مش هيكلمونى كل يوم يشوفونى موتت ولا لسه
جيرانى ؟؟ مش بيحبونى ولا يعرفونى اصلا عشان يمشو فى جنازتى
طيب مين ؟؟ ..
طب و لو فرضنا نى قتلت نفسي (انتحرت يعنى) حد هيمشي في جنازتى ؟؟ ولا هيقولو دى كافره و ممكن ما اتدفنش مع المسلمين أصلا؟؟
طيب هو مين هيزعل اصلا؟؟ و هيزعل ليه وانا عمرى ما زعلت على حد مات؟
و ياترى هيزعل كتير ولا شويه كده و اتنسي؟؟
وياتري لو افتكرونى كتير .. هيفتكرونى قد ايه يعنى ؟؟ لحد ما يموتو هما كمان؟
طيب و مين هيفتكرنى ؟ و هيفتكرنى ازاى و انا عمرى ما عملت حاجه عظيمه يعنى عشان الناس تفتكرنى بيها ؟
طيب و مين هيفرح و يقول خدت الشر و راحت ؟ و هيقول ليه و انا عمرى ما عملت حاجه وحشه فى حد؟؟
طيب .. طيب وحاجاتى هتروح فين ؟ اوضتى و هدومى و موبايلي و مدونتى و كتبي و كل حاجه ؟؟
هتفضل ضلمه بردو زى التربه اللى هتدفن فيها صح؟؟
طيب انا النعش اللى هروح بيه هيبقي خشبه نضيف و يحطو علم مصر من فوق ولا هيكون اتنقل فيه تسعميت واحد قبلي؟؟
طيب هيتعملى صوان و يتاخد عزايا ولا هيقولو الصوان و العزا للرجال فقط و تبقي تفرقه فى الحياه و الموت؟؟
مش عارفه بس أسئله كتيره هاموووووووت و اعرف اجابتها .. مش من باب حب الاستطلاع اكتر من كونه من باب انى اثبت لنفسي مقوله سواقين التوك توك الشهيره "مفيش صاحب صالح .. كله بتاع مصالح"
هناك تعليق واحد:
اسئلة كتير بتيجى فى دماغنا وده مش تشاؤم ولا حاجه هى بس مجرد عايزة تعرفى مدى معزتك عند الناس دى
المضحك بقى بتفكر فيلم احمد زكى معالى الوزير لما قام من الموت وقال طيب والله ما انا مدفن غير لما تعملولى جنازة ملكى :)
إرسال تعليق