الجمعة، 3 يونيو 2011

نظرة من البلكونه ...

كل ما أكون مخنوقه أقف فى البكونه و أبدأ أسرح فى كل حاجه بأشوفها منها و بأشوفها بالترتيب من أول نقطه تحت البيت و لحـــــد اخر نقطه بتوصلها عينى

شارعنا :
لما بأقف فى بكونه بيتنا بأشوف بواب العماره و أولاده بيجرو و يلعبو بدون خوف وبدون ما يعملو حساب لنظرة الناس ليهم و هما بيلعبو فى الشارع .. تقريبا اكتر اطفال احرار شوفتهم .. مش شايلين هم حاجه غير لقمه عيشهم .. عمرهم ما فكرو يقرو كتاب يبرجل دماغهم او يكون لهم نشاط سياسي يبقي سبب تعاستهم فى يوم .. مستعدين يشتغلو اى حاجه فى الدنيا تجيب فلوس نفسهم يبقو سكان فلل رغم ان مكانهم احسن بكتير .. نفسي اعرف نظرتهم لينا كـ سكان فى الدور ال 11 و هما سكان البدروم عامله ازاى ؟؟ أكيد نفسهم يطلعو فوق.. لكن يوم ما هيطلعو هيندمو و يحسدو اللى تحت.. اللى ما يعرفهوش انهم اكتر حرريه بكتيييييييييير حتى لو كانت ظروفهم الماديه أقل (مع العلم ان بواب عمارتنا اللى فات كان صاحب أكبر عمارتين فى المنطقه :)
بأمشي بعيني فى شارعنا و أشوف الناس اشكال و ألوان ماشين فى الشارع .. اللى بتدلع و اللى مستعجل و المنتقبه و اللى بشعرها واللى بيراقب اللى ماشي واللى بيتكلم على الناس و و و .. ياااااه ناس كتير اوى .. بقعد أفكر .. ياتري كل واحد فى دول دماغه فيها ايه؟؟ ولو جه يوم و كل الناس دى فكرت فى حاجه واحده بس ياترى هيطلعو بإيه ؟
قصاد بيتي فى جامع .. بيبقي زحمه جدا كل يوم جمعه .. الناس نازله تصلى بالجلاليب البيضا و بعد الصلاه شويه منهم يقفو قدام الجامع يتكلمو عن مشاكل المنطقه و شويه يروحو عند صاحب البقاله يتكلمو على الناس و شويه يقعدو على القهوة يحششو و الشباب بقي يروحو على النادى يقعدو مع البنات .. الخ الخ الخ .. المهم بقي انى عمرى ما شوفت الجامع زحمه غير فى صلاه الجمعه و قليل جدا ما يكون فيه ناس باقى الصلوات طول الاسبوع
فى أخر شارعنا فى كتدرائيه .. ومش عارفه ايه السر فى ان المسلمات بيحبو يروحوها و بيكونو مبسوطين جدا فيها .. دى مش فتنه بس دا انا شوفته بعيني فى اكتر من جاره ..المهم بقي ان الكتدرائيه دى صاحبها هو نفسه صاحب عمارتنا و صاحب نص عمارات المدينه و بناها عشان يكفر عن فلوسه اللى جمعها نصب وافترا على البنى اٌدمين بعنى المفروض انها بفلوس حرام .. مااا علينا عشان مش هتكلم فى الموضوع دا انا

المزرعه و كلاب المزرعه :
دى مزرعه فراخ .. بتنتج انتاج قليل جداا وشبه مش شغاله رغم مساحتها و امكانياتها الرهيبه الموجوده جواها .. و الله اعلم ايه بيتعمل فيها جوا و اصحابها مصممين انها تفضل شغاله ليه رغم عدم انتجها !!
كلاب المزرعه دول بقي حكااايه .. ممكن فى يوم نصحى على صوتهم لان واحد من البنى اٌدمين المفترين ضرب كلب منهم مثلا و الكلب تعب ف باقى الكلاب تتلم عليه و تنبح طول الليل .. او الست بتاعت الغنم تيجي بالغنم بتاعها ف الكلاب تجمع بعض و تقف من بعيد تنبح لحد ما الغنم يمشي
يمكن هى مجرد كلاب لكن صدق من قال انها أوفى الكائنات .. منظر الكلبه لما بتولد و تقعد ترضع ولادها او الكلب اللى بيجيب الاكل للكلاب الصغيره او او .. بحس انهم بيحبو بعض و يخافو على بعض جداااااااا رغم انهم كلهم جربانين ^_^

سكه القطر
دا قطر السويس بيفكرنى بأيام ما كنت بأسافر اسكندريه بالقطر و اسرح فى وشوش الناس اللى بتنزل و تطلع و تتغير مع كل محطه .. منهم الحزين و منهم المبسوط منهم الراضى بحياته او الناقم عليها و فيهم اللى بيحب يركب القطر و فيهم اللى عايز يرمي نفسه تحته.. قطر بيلف محافظات كتير الدنيا كلها بتتغير من حواليه و هو ثابت طريقه ما بيتغيرش .. اوقات كتير بيفكرنى بالطريق اللى انا راسماه لنفسي في الحياه .. سكه قطر

المنطقه الصناعيه
بعد سكه القطر باشوف مجموعه مصانع و شركات كبيره ولما بأدقق النظر بلاقي مكن شغال و تروس عماله تلف مش ممكن حاجه تعطلها .. بأفتكر يوم ما مصنع منهم النار مسكت فيه و المطافى وصلت بعد ساعه وكان كل شيئ جواه انتهى .. انا وعلى بعد المسافه دى كنت حاسسه بحراره النار فى بلكونتى ومش عارفه اعمل حاجه وبسبب الحريق اتشرد عمال كتير و أسرهم
المصانع دى فيها دوريات شغاله 24 ساعه فى اليوم ودايما بيطلبو عمال لانهم مش بياخدو مقابل محترم لشغلهم المتعب ورغم كده العمال بيستسهلو يسيبو الشغل و يدورو على غيره اكتر من انهم يطلبو حقهم من اصحاب المصانع .. وطبعا عمر ما حد منهم فكر يطالب بحقه من الدوله

الطريق الرئيسي
طريق جسر السويس و من بعده صلاح سالم .. طريقين دايما زحمه دايما شايلين هموم الناس بدون ملل .. لما تركب الاتوبيس تلاقي ناس مش بتشبع كلام و عن كل حاجه فى الدنيا ولما تركب الميكروباص تسمع شتيمه و سب دين للطريق نفسه و لما تركب موتوسيكل تلاقيه ما بيرحمش حتى جوانب الطريق من العذاب و بيمشي فيها.. اوقات بيصعب عليا الطريق من اللى بيشوفه و يسمعه .. اصله فى الاخر ملوش ذنب يعنى دا الناس اللى ماشين فيه هما اللى زاحمينه و هما نفسهم اللى بيشتموه عشان هو زحمه ..ورغم كده عمر ما حد فيهم فكر يطالب المسئولين بتحسين الطريق .. طب هو ذنبه ايه يعنى؟؟
حوادث الطريق دا بتفكرنى بحوادث حياتى .. ياما كنت هموت و انا باعدى الطريقين دول و رغم كده بحب اقف على جنب الطريق بليل واتفرج على سرعه العربيات و بعشق انوارها السريعه و هى بتعاكس الليل .. باقف اتفرج عليها و اتمنى اعيش و اعيش و اعيش لاخر الكون عشان اعرف بعد مئات السنين العربيات دى ممكن تبقي ايه؟؟
لما بتمشي العربيات النقل التقيله و تهز الشارع بحس بهزة جوايا بتقولى اصحى و فوقى كفايه كده انا ممكن اخد عمرك فى ثانيه

العمارات
فى كل مكان عمارات .. عواميد خرسانه كاتمه على نفسنا .. و كم اطباق دش رهيب فوق كل عماره يحسسك ان فى عباقره جوا العماره متابعين اهم برامج و تقنيات العالم .. كل دى عمارات و كل عماره فيها ما لا يقل عن 50 شقه وكل شقه على الاقل 4 افراد ورغم كده كلها عمارات فااااارغه .. فارغه من الهدف من الامل من الحياه .. اقصى حلم ممكن تلاقيه جوا شقه منهم ان الام عايزة تغير النجف و الاب عايز يشتغل فى بنك و الابن عايز يسافر مارينا و البنت عايزة تروح النادى و تبات مع صاحبتها ... قلييييل مره لو لاقيت حد فيهم عايز يعيش على قد رزقه ومش باصص لفوووق او حتى باصص لابعد مكان و بيشتغل الشغل اللى يوصله للمكان دا.. و قلييييل مره لو لاقيت عند حد منهم حلم قومى عربي مصري اصلى مثلا .. او ااااى حلم محترم يعنى
تحت كل عماره بقي اكوااااااام زباله و كأن مفيش زبال محترم بيجي كل يوم ياخد الزباله لكن نقول ايه النضيف نضيف


المطار
كل حد يقف فى الشباك او البلكونه يعجب جدا بمنظر المطار و ينسي يشوف اى حاجه تانيه غيره .. مش عارفه اذا كان بتعجبهم الطيارات الكتير ولا سرعتها ولا قدرتها على الطيران بلا حدود
لكن انا على قد ما بحب اركب الطياره على قد ما بكره كونها محكومه بخط سير محدد ومواعيد و تذاكر وو التزامات تخنقك و تنسيك انك حر فى السما
اوقات كتير بشوف انه سبب كل البلاوى اللى احنا فيها .. بسببه اتهربت فلوسنا و تعبنا وكل حاجه حلوة .. و بسببه وصللنا المخدرات و الجواسيس و كل شيئ سخيف
اوقات المطار بيكون منور فى عز الضهر واوقات بيخلى الليل ضهر و اوقات تلاقي انواره عاديه بليل .. و عرفت السر في كده .. دى انوار صاله كبار الزوار .. و بقي كل ما نشوف نور المطار كده نعرف انه فى كبار زوار النهارده .. مين بقي كبار الزوار ؟؟ الله اعلم
حتى المطار فيه تفرقه عنصريه
على يمين المطار فى منطقه فلل و بعد المطار فى مساكن شعبيه مش عارفه بتاعت ايه بالظبط بس تخيل نفس فرق المسافه بين يمين المطار و شماله تعمل الفرق دا فى مستوى المعيشه !!!

السما و السحاب
السما دى قمه الحرررررررررررررريه .. يا ما بصيت لفوق و قعدت اغنى "بدى اتنفس حريه "
طيب إسألو العصافير اشمعنى بتطير فى السما ؟ هتقولكم لان الارض مكتومه و خنقه و غبيه
وإسألو السحاب ليه بيضا ؟ هتقولكم لان السواد دا فى الارض و فى قلوب البشر و بس

نفس المشهد فى حاجات كتير اوووى تانيه .. هكتبها لنفسي بعدين
اكيد هيجي يوم و اقرا الكلام دا و اقعد اضحك على نفسي فيه اوووووووووى :)

إرسال تعليق

Translate

Related Posts Plugin for WordPress, Blogger...
حدث خطأ في هذه الأداة